హైదరాబాద్ లో యువతిపై ప్రేమోన్మాది దాడి

హైదరాబాద్ లో మరో దారుణం జరిగిపోయింది. త్యాగానికి నిదర్శనంగా ఉండాల్సిన ప్రేమ పైశాచికంగా మారటం ఇటీవల కాలంలో చూస్తున్నదే.కోరుకున్నది సొంతం కావాలన్న దుర్మార్గమైన వైఖరి ఈ మధ్య కాలంలో అంతకంతకూ పెరుగుతోంది. తల్లిదండ్రుల గారాబం.. కొండ మీద కోతినైనా తెచ్చి పెట్టేంత ప్రేమను పంచుతున్నా.. ఇంట్లో ఉన్న ప్రేమ సరిపోక.. రోడ్ల మీద ఇష్టం వచ్చిన రీతిలో చెలరేగిపోతున్న కొందరి కారణంగా దారుణాలు చోటు చేసుకుంటున్నాయి.

తాజాగా అలాంటిదే చోటు చేసుకుంది. తన ప్రేమను అంగీకరించలేదన్న కోపంతో కక్ష కట్టిన  డిగ్రీ చదువుతున్న కుర్రాడు ఇంటర్ చదువుతున్న అమ్మాయిపై కొబ్బరిబొండాం కత్తితో దాడి చేశాడు. తీవ్రంగా గాయపడిన ఆమె.. కొన ఊపిరితో కొట్టుమిట్టాడుతోంది. సంచలనంగా మారిన ఈ దుర్మార్గంలోకి వెళితే.. బర్కత్ పురా సత్యానగర్ కు చెందిన విద్యార్థికి ఒకరు ఇంటర్ చదువుతోంది.

ఆమెను అదే ప్రాంతానికి చెందిన భరత్ కొంతకాలంగా ప్రేమిస్తున్నాడు. తన ప్రేమను ప్రదర్శించే ప్రయత్నంలో ఆమెను అడ్డుకోవటం.. ఒత్తిడి చేసేవాడు. తాజాగా మరోసారి ప్రేమించాలని ఒత్తిడి చేయటం.. ఆమె కాదని చెప్పటంతో కోపంతో ఊగిపోయిన భరత్.. వెంటనే తనతో తెచ్చుకున్న కొబ్బరిబొండాం కత్తితో ఆమె మెడపై వేటు వేశాడు. అనంతరం ఘటనాస్థలం నుంచి పరారయ్యాడు.ఈ దారుణాన్ని చూసిన చుట్టుపక్కల వారు వెంటనే అంబులెన్స్ లో ఆసుపత్రికి తరలించారు. ప్రస్తుతం మలక్ పేటలోని ఒక ప్రైవేటు ఆసుపత్రికి తరలించారు. బాధితురాలి పరిస్థితి విషమంగా ఉందని వైద్యులు చెబుతున్నారు. ప్రేమ ప్రేమను కోరుకుంటుందే కానీ.. ఇలాంటి బలిని కోరుకోదన్న విషయాన్ని గుర్తించాల్సిన అవసరం ఉంది. కానీ.. అదేమీ పట్టని ఈ తరం తమకు నచ్చిన వారిని.. తమ సొంతం చేసుకోవాలన్న ఆలోచనే తప్పించి.. వారికో మనసు ఉంటుందన్న విషయాన్ని మర్చిపోతున్నారు. ఇలాంటి తీరును అందరూ ఖండించటమేకాదు.. ఇలాంటి నేరాలు చేసే వారిని కఠినంగా శిక్షించాల్సిన అవసరం ఉంది.